عشر نصائح لبعض البنات علشان متضفضحش قدام خطيبها فى اول خروجا
1- الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا من البوز زي الخنجر ولا من فوق طبعًا.
2- العيش أوعي تفضحينا وتقطعيه بسنانك و لا الرغيف نصين بأيدك وكل نص لقمة وتحشري.. لا أوعي.. العيش بيتقطع بالسكينة في الطبق. وبعدين تاخدي لقمةلقمةبالعافية..... قال يعني نفسك مسدودة.. اضغطي على أعصابك جدااا
وبعدين لما تروَّحي.. إبقي حِفِّي زي مانتِى عايزه.
3- الشوربة.. أبوس رجلك يا شيخة.. الشوربة تتشرب من غير صوت خالص.. ومن غير ماتقعدي تنفخي فيها.. زي القهوجي اللي بينفخ في الحجر .. وطبعًاا عايزك تنسى تمامًاالسلطانية اللي بتدلقيها على بقك في البيت..وتدلدقي على روحك
بالمعلقه وبدون صوت.سخنة ولعة برضه بدون صوت.. وتسيبي تلت الطبق ع الأقل... مش تميليه على بؤك.... عشان تلهطيها لآخر نقطة وكأنك حالفه ما تسيبى فيها نقطه
4- الرز طبعاً بيتاكل بالشوكة أوعي إيدك تتمد ع المعلقة وتغرفي من طبق الرز وتعبي يلا إوعي.. الرز بالشوكة.. وكأنك بتبوسيه مش بتاكليه.
5- المكرونة.. الاسباجتي.. برضه بالشوكة.. تتلف على طرف الشوكة.. لحد ما تخلص وبعدين تحطيها ف بؤك من سكات.. مش تشفطي المكرونة عود عود
6- السمك
مشكلة ده شوفي
بتفصلي اللحم عن الشوك.... إزاي؟؟تقطعي اللحم من النص.... بالطول وبعدين تفردي اللحم ع الجانبين ولما تخلصي ناحية.. متقلبيش السمكة.... بلاش فلح
شيلي السلسله بالشوكة والسكينة , وحطيها ف جنب الطبق وكملي أكل النص التاني وبدل الفيلم الهندي ده.. نصيحة.. ماتكليش السمك خالص.. قولي مابحبش السمك اصلا وخلصي نفسك
7- الجمبري.. -إذا كنتي عارفاه.. أول ماطبق الجمبري
ينزل... بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت بابااااا.. وأتنهدي جامد وقولي.. برضه..؟؟؟
وتروحي قاطعة راس الجمبريياية.. بالشوكة.. أنا ف عرضك
إنسي المصمصة دلوقت
8- البطاطس سواء مسلوقة أو محمرة... أوعي تهرسيها وتدبيها ع الرز وتبدي ....لا..لآ...لآ...بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي
9- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولةوبعدين ف طفاية السجاير اللي ع الترابيزه.. أوعي ياحبيبتي من نظام التفتفة للبذر.. إنسي
10- ولما تخلصي أكل تحطي إيدك على بطنك.. اللي عصافيرها بتصوصو من العينات اللي كلتيها وتقولي له مش ممكن..أنا عمري ما اتفجعت كدة
أنا أودامي أسبوع.. هابطل أكل فيه
وبعدين تمسكي الفوطة اللي دايمًا موجودة ع التربيزة من غير لازمة دى.. وتبوسيها.. آل يعني بتمسحي بؤك
وبعدين تستأذني منه لدخول التويلت لإصلاح ماكياجك.. وتخشي التويلت وتطلعي من شنطة إيديك..
لفة الفول والطعمية اللي جايباها معاكي.
وربنا يتمم بخييييييييير
************************************
في القسم الترفيهي بعنوان للبنات فقط
الأربعاء 17 يونيو 2015, 21:59 من طرف ragyattelgna
