وتبقى يا مصر

متهربش
وقول كلمه
عرفتك من زمان قادر على الصدمه
ميلادى كان ف يوم نصرك
ونصرك كان لنا قوه
أنا هوه
ومتغيرش غير شكلى
لكن دمعى فضل هوه
بكيت لما اتولد نفسى
ولسه ببكى م القسوه
ميلادى كان على حجرك
وكنت أخشى
لموتى يكون على حجرك


متهربش
ده طين بلدى على راسك
وموت ولدى بحراسك
وحراسك على وشى
مبين عينى وبين رمشى
وفى عيشى وفى قشى
نسيت امشى
لأن ف رجلى أجراسك
وأجراسك
صداع دايم وخوف حايم بيملانى
أنا تانى
مكنت نسيت
وعنوانى اندفن ف البيت
مبين دمعى وأحزانى
وأحلامك ونبراسك


متهربش
ده ابنى كان ف يوم ابنك
بيدعيلك يصليلك
ويسهر ليله يغزلك
عشان خيره ميوصلك
يكيسلك وينفخلك جيوب ابنك
د كان فاكر بانه ف يوم يكون ابنك
مشفتش دمه فوق أرضك
مشفتش ضربه بالجزمه
وسحل عنيه
أقولك ايه
ده كان عينى
وكان دمعه بيكوينى
وكان حضنه.....ده كان حضنه يدفينى
أقولك ايه...... دكان ابنى
أنا آسف......أنا ابنه
مشفتش فوق ايديك دمه
ولا همه ولا أمه
وجواها لهيب ناره
بتدعى عليك وتحلفلى لجيب تاره
متهربش
أنا حالف لجيب تاره


متهربش
وشوف ظلمك
ولون الشعب من قهرك
وطين الأرض من ذلك
أنا بقولك
خلاص بكره هاشوف ابنى
وهخده بين ضلوع حضنى
ألوف ابنى ..ألوف ابنى ..ألوف ابنى
هتسبغ لون شوارعكى..عمايركى
وتحضنكى
وبعد الصمت تنطقكى
تعلى الصوت خلاص انتى
وفوق الكل
يا شمس وضل
تموت الدنيا ف عيونا وتبقى الأصل
يا ست الكل
يموت القصر
يموت حتى مليك القصر
يموت ابنى
أنا راضى يموت ابنى
وتبقى يا مصر

الله عليك يااستاذنا
تسلم

جمـــــــــــــــــــــــــيل

الله ينور يا أستاذنا

شكرا ليك موضوع يجنن